med an aundan briaf fon mia zu dia

a dauwal miassad med an briaf
fon mia zu dia fliang
a schwäuwal miassed med an briaf
fon mia zu dia fliang
a r aumschl miassad med an briaf
fon mia zu dia fliang
a gaunze lufft fola fegl miassad kuma
und med mein briaf
fon mia zu dia fliang

i mechat da r an briaf schreim
an den wos a da r a frische rosn
zwischn zwa blaln babia legad
i mechat da r an briaf schreim
en den wos a da fua n zuabikn
mei gaunz heazz ois geschenk einelegad
zwischn de blaln

med ana blaun dintn how a da gschrim
das e en hümmi in deine aung sich
med ana grinan dintn how a da gschrim
das e in früling gschpia r waun sd vuabeigest -
med ana schwoazzn dintn owa mecht e da
jezt feialich auf s rosarode babia schreim
das da r mei heazz gheart
solaung unsa r wöt des ertrogt

med ana schwoazzn aumschl
wia r a da r an briaf schikn
med an blaugrinan schwäuwal
wia r a da r an briaf schikn
med ana rosarodn daum..

a bunte lufft fola fegl
wiad med mein liebesbriaf augflong kuma
und auf d nocht duach s fenzta
fua dei bet zuwe fliang

med an bussl vo mia...

© Robert Kaiser, 15. 3. 2000